ROXAS CITY – Preparado na ang pamunuan sang Capiz State University (CapSU) sa pag-implementar sang bag-o nga schedule sang pagbukas sang klase subong Academic Year 2019-2020.
Ini ang ginpahayag ni CapSU President Dr. Editha Alfon sang mainterview sang Bombo Radyo.
Ini ang kasunod sang ginpapanaog nga memorandum sang Commission on Higher Education (CHED) nga nagamandu sa tanan nga mga state universities and colleges (SUCs) kag mga local universities and colleges (LUCs) nga igasaylo ang pagbukas sang klase sa bulan sang Agosto.
Ang nasambit nga memorandum nga ginpetsahan Abril 5, sini nga tuig, ang gin-isyu mismo ni CHED Chairman Prospero de Vera Jr. sa mga opisyal sang CHED kag mga pinuno sang SUCs kag LUCs.
Suno kay Dr. Alfon nga ang Rehiyon 6 na lamang ang wala nagasunod sa mandatu sang CHED rason nga ginpakamaayo sang pamunuan sang CapSU nga magsunod na sa bag-o nga schedule sang pagbukas sang klase.
Apang ginklaro sini nga magapabilin sa gihapon ang schedule sang ila nga admission subong nga bulan sang Abril kag sa bulan sang Mayo naman ang enrolment.
Mahibaluan nga ang mandu sang CHED ang nasandig man sa mga probisyon sang Republic Act 7722, nga kilala bilang Higher Education Act of 1994, kag sa Commission En Banc (CEB) Resolution No. 142-2019.
