Ginbuyagyag ni Cardinal Pablo Virgilio David nga may yara sang P47.6 bilyon nga budget nga gin-alokar para sa mga mamalidha sang pungsod, base sa datos nga iya ginpaambit gikan sa 2025 General Appropriations Act (GAA).
Suno sa iya, ang tagsa ka senador may yara sang tuigan nga budget nga P580.42 milyone, nga kon ipaambit sa 24 ka mga senador nagalab-ot sa mga P13.93 bilyonespara sa senado sa isa ka tuig. Katumbas ini sang mga P48.37 million kada bulan ukon P1.61 million kada adlaw kada senador.
Samtang ang tagsa ka kongresista ang may annual budget nga P106.53 milyon. Sa kabug-usan nga 316 ka miyembro sang Kamara, nagalab-ot ini sa P33.67 billion para sa mga House of Representatives.
Katumbas ini sang P8.88 million kada bulan ukon P292,598 kada adlaw kada kongresista.
Dugang pa ni Cardinal David, wala ini nagalakip sang ginatawag nga “komisyon” ukon kickbacks gikan sa mga proyekto, subong man ang mga pundo gikan sa unprogrammed appropriations kag patronage funds nga nagaagi sa mga ayuda programs pareho sang MAIFIP, TUPAD, AICS, kag AKAP.
Ginhatagan pagtamod sang Cardinal nga nagapabilin nga seryoso ang pamangkot kon paano ginagamit ang tuman ka dako nga kantidad, ilabi na nga ang pungsod padayon nga nagabaha sa mga hulot-klasehan, ang mga ospital kulang sa katre, ang mga mangunguma nagakalumos sa utang, kag ang mga mamumugon nagakabuhi sa kapigaduhon.
Pahayag pa sini nga ang P47.6 bilyon para sa mga mamalidha, antes pa man maglakip sang patronage kag komisyon, indi lamang isa ka moral nga isyu kundi isa ka pungsodnon nga isyu.
Samtang, ginahulat pa niya kun pila ang gin-alokar sang mga mamalidha para sa ila kaugalingon sa 2026 General Appropriations Act.
