Nakahanda ang Philippine Bar Association (PBA) nga magserbe nga host sa plano nga public debate nanday Antonio Carpio kag Rodante Marcoleta kaangut sang isyu sa West Philippine Sea.
Suno sa PBA, magahatag sila sang neutral kag safe nga venue, professional moderators nga eksperto sa constitutional kag public law, kag maathag nga protocols agud masigurado ang patas nga daloy sang talakayan, patas nga oras, kag maayos nga decorum. Makaangkon man sang access ang accredited media kag livestreaming arrangements para sa transparency.
Ginhimo sang PBA ang offer matapos nga ginbaton ni Carpio ang pagpanghangkta ni Marcoleta para sa isa ka “friendly debate,” kun sa diin ginsuhestyon ni Carpio nga talakayon ang legal nga pag-igsistar sang West Philippine Sea kag ang estado sang Kalayaan Island Group.
Hugot naman nga ginhatagan sang igtalupangod sang PBA nga importante ang bukas kag matinahuron nga pagbayluanay sang mga panan-awan agud nga mas mahangpan pa sang publiko ang amo nga isyu.
