ROXAS CITY, CAPIZ- Ginpakigbahin sang isa ka opisyal sang Barangay Cagay, Roxas City nga indi tanan nga ginbaha ang makabaton sang P5,000 tubtob P10,000 nga cash assitance halin sa Department of Social Welfare and Development (DSWD).
Sa interview sang Bombo Radyo kay Kagawad Isidro Aragon, iya ginpahayag nga bangud magaagi sa assessment ang tyagsa ka mga nagpasa sang rekoritos sandig sa guidelines nga ginpagwa ang DSWD.
Suno kay Aragon, sa ginpatigayon nga emergency meeting kaupod si Mayor Ronnie Dadivas, mga katapo sang DSWD, CSWDO, kag tanan nga mga Punong Barangay sa syudad, ginhinalaan kun paano ma-identify kag ma-validate ang mangin benepisyaryo.
May duha ka kategorya nga gintalana ang ahensya sa diin amo ang severely affected ukon totally damaged, nga mahimo nga magbaton saang tig-P10,000, kag slightly affected nga mahimo nga magbaton sang P5,000.
Pahayag nya, madamo naman sang nabatian nga reklamo sa pila ka mga pumuluyo ang barangay apang ginakabig ini sang mga opisyales nga normal kag ginsiling nga ginahimo lamang nila ang ila obligasyon nga wala sang pinilian kag nagasunod lamang sa mga pagsulundan.
Nagpasalig naman ang natungdana nga ang tanan nga mga pumuluyo sang ila nga barangay, makabaton gid sang food packs.
Interviewed by Bombo Sunnie Mae Constantino Batencila
