Padayon ang pagasaka sang ginapadala nga kwarta mula sa mga overseas Filipino workers (OFWs) matapos ginreport sang Bangko Sentral ng Pilipinas (BSP) nga naglab-ot sa $3.18 bilyon ang cash remittances sang Hulyo 2025.
Ini ang 3% nga mas mataas kun ipaanggid sa $3.08 bilyon nga narekord sa kapareho nga bulan sang tinalikdan nga tuig.
Suno sa Bangko Sentral ng Pilipinas, $2.59 bilyon ang ginpadala sang mga land-based workers, samtang $585 milyon naman ang halin sa sea-based OFWs.
Umpisa Enero tubtob Hulyo, naglab-ot na sa $19.93 bilyon ang kabilugan nga cash remittances — nagsaka sang 3.1% kun ipaanggid sa pareho nga panahon sang 2024.
Pinakadako nga bahin sang remittances ang nagikan sa Estados Unidos, kasunod ang Singapore kag Saudi Arabia.
Samtang, nagsaka man ang personal remittances sa $3.53 bilyon subong nga Hulyo, mas mataas sang 3.1% halin sa $3.43 bilyon tinalikdan nga tuig.
Ang remittances ang padayon nga nagaserbe nga impotante nga haligi sang ekonomiya sang pungsod, suno sa mga eksperto, bangud ini ang nagapabaskog sa household spending.
Sandig sa report sang Philippine Statistics Authority (PSA), nagdabong sang 5.5% ang household consumption sa ikaduha nga quarter sang 2025.
