Ginreport sang Chinese state media nga ginbayaw sang China Coast Guard (CCG) ang ila bandera sa Sandy Cay (kilala sa Pilipinas bilang Pag-asa Cay 2) sa Spratly Islands kag nagdeklarar sang “soberanong hurisdiksyon” sa lugar.
Suno sa report sang Global Times, ang insidente natabo “sa tunga-tunga sang Abril,” sa diin ang mga tinawo sang CCG nagpatigayon man sang inspeksyon kag pagpanglimpyo sa nasambit nga reef.
Ginkumpirmar sang Armed Forces of the Philippines (AFP) nga magapaguwa sang opisyal nga pahayag ang National Task Force for the West Philippine Sea (NTF-WPS) angut sa insidente.
Ang Sandy Cay malapit sa Isla sang Pag-asa sa West Philippine Sea (WPS), sa diin nakabase ang mga soldado nga Pilipino kag isa ka gamay nga komunidad.
Sang Enero, gin-akusahan sang Philippine Coast Guard ang CCG kag Chinese Navy nga nagapang-harass sa mga sakayan pandagat sang Bureau of Fisheries and Aquatic Resources (BFAR) nga nagapadulong sa Sandy Cay para sa marine survey, kasunod sang mga report nga may mga nadugmok nga korales nga ginbutang sa lugar.
