ROXAS CITY, CAPIZ – Nakahanda na ang mga tinawo sang City Disaster Risk Reduction and Management Office (CDRRMO) para sa pag-obserbar sang Semana Santa subong nga tuig.
Ginpahayag ni CDRRMO Head Mr. Dennis Saneo nga umpisa sa masunod nga semana, maga-heightened alert ang CDRRMO kaupod ang mga nagkalain-lain nga partner agencies kasubong sang PNP & PNP-Maritime Group, PCG, BFP, Red Cross, CERT, RCERT kag iban pa nga magabulig sa pagbantay kag pagmintinar sang kalinong sa Semana Santa.
Suno pa kay Saneo nga may mga welfare desk nga ipahamtang sa mga terminal, paluparan kag pantalan nga mahimo dangpan sang mga pasahero nga magapauli kag subong man mga turista nga ginalauman nga magadugok sa tion sang Holy Week.
Maga-deploy man sang mga personnel sa mga designated area ilabi na sa tion sang Easter Sunday nga ginalauman madamo sang mga magapadulong agud magpaligo sa baybayon sa mga coastal barangay sang syudad nga kaangay na lamang sang Baybay, Cogon, Punta Cogon kag Talon.
Samtang, ginahinyo man sini sa mga pumuluyo nga magkooperar kag magtuman sa mga otoridad para sa malinong nga pag-obserbar sang Semana Santa.
