Ginakabig nga iligal ang ginpatigayon nga ceremonial installation sang Department of Agrarian Reform (DAR) sa mga Agrarian Reform Beneficiaries (ARBs) sa duta sang Barangay Dulangan kag San Esteban, Pilar, Capiz sang damlag lang.
Ini ang ginpahayag sang administrador sang pamilya Tan nga si Punong barangay Ferdinand Bacanto sang Barangay Culilang, President Roxas, Capiz.
Suno sa opisyal nga gintawag sini nga iligal ang nangin tikang sang DAR bangud ang gin-install sang ahensiya wala sang legal standing ukon wala sang proper identification sa mga benepisyaryo.
Importante suno kay Bacanto nga properly ma-identify ang mga benepisyaryo bangud sila ang may kinamatarung nga maka-avail sang duta.
Apang mayorya sa mga ARBs ang miyembro sang task force mapalad kag anak pawis kag Montecarva task force Mapalad nga indi programa sang DAR kundi sang leftist group.
Ginpahayag ni Kapitan Bacanto nga indi man lipod sa ihibalo sang ahensiya nga may pending petition kag mga kaso pa sila nga ginpalab-ot sa Court of Appeals (CA) nga wala pa ang resulta.
Mas maayo kuntani suno kay Bacanto nga ginhulat ang desisyon sang korte antes ginpatigayon ang programa sang DAR, bangud sin-o ang magapahalin sa mga benepisyaryo nga na-install na kun ma-reverse ang desisyon kag magpabor sa tag-iya sang duta.
Ginkwestyon pa sang opisyal ang gamay nga ektarya sang duta nga nagkadto sa legal nga benepisyaryo bangud mas gin-akomodar ang ginasiling nila mga benepisyaryo nga kalakip sa ginsumiter nga masterlist.
Suno kay Bacanto nga sandig sa laye tatlo ka ektarya sang duta ang makadto sa legal nga benepisyaryo.
Wala man nauyunan ni Bacanto ang pagpadala sang madamo nga miyembro sang militar kag pulis sang ahensiya sa lugar agud indi makatuga sang kinagamo ang kampo sini.
Ginpanindugan sang opisyal nga wala sa iya bokabolaryo nga maghimo sang physical protest kabaliskaran sa ginaalegar sang DAR, bangud sa korte sini ipakita ang tanan nga mag dokumento.
Gintuad pa sini nga magapasaka ini sang tatlo ka complaint sa masunod nga semana sa diin kalakip diri ang Provincial Agrarian Reform Program Officer sa Capiz, Regional Director sang DAR kag iban pa.
