ROXAS CITY, CAPIZ- Nagapanawagan ang Chairman sang Roxas City Fisheries and Aquatic Resources Management Council sang patas nga pagpanghatag kag pag-avail sang mga benepisyo nga ginahatag sang mga natungdan ilabi na sa mga ahensya sang gobyerno.
Sa interview sang Bombo Radyo kay Ronilo Combate, Chairman sang Roxas City Fisheries and Aquatic Resources Management Council, iya ginpahayag nga kaangay indi manami ang pagdumalahan sa subong sang mga natungdan.
Suno kay Combate, sa lista kag datos nga iya nakuha nagikan sa Roxas City Agriculture Office, naggwa nga kaangay wala madala sa lista ang kinahanglan nga mahatagan apang adtong patay na yara pa sa listahan.
Pahayag niya, kuntani mahatag sang mga natungdan nga ahensya partikular ang Bureau of Fisheries and Aquatic Resources (BFAR) ang tagsa ka mga kinhanglan nila nga mga manugpangisda kasubong sang bangka kag iban pa nga mga kagamitan.
Nahibaluan nga madamo sang mga manugpangisda ang naapektuhan sa syudad sang Roxas sang tion nga nag-igo ang bagyo sa diin nga ginhalitan ang ila sini tagsa ka mga bangka nga ginahalinan sang ila nga income.
Magluwas sina, nagapanawagan man ang natungdan nga kuntani tanan nga mga manugpangisda maka-avail sang fuel subsidy.
Nagalaum ang natungdan nga mapatian sang Regional kag National nga lebel ang iya nga mga panawagan agud mahatagan sang nagakaigo nga igtalupangod.
Interviewed by Bombo Francis Biñas
