Ginasigurado sang Roxas City Government nga yara sa maayo nga kahimtangan ang masobra 100 ka pumuluyo nga naapektuhan sang demolisyon sa Barangay Dinginan bangud sa pagtindog sang slaughterhouse sa lugar.
Sa interview sang Bombo Radyo kay Roxas City Mayor Ronnie Dadivas, iya ginpahayag nga ginhatagan sang syudad ang mga apektado nga pumuluyo sang housing units kag duta nga yara sa 54 square meters.
Suno kay Dadivas, may ara man sila sang financial assistance kag cash allowance agud masuportahan ang ila pangabuhi samtang naga-adjust sa bag-o nga lugar.
Dugang pa sini nga ang amo nga tikang ang padayon sa pagbulig sa mga pumuluyo kag paghatag sang proteksyon sa ila nga pangabuhi.
Nahibaluan nga ang relocation site sang mga panimalay ang yara sa Tanzaville sa syudad sang Roxas.
