Ginlunsyar na sang Bombo Radyo Philippines kaupod ang Bombo Radyo Philippines Foundation, Incorporated ang Dugong Bombo 2026: A Little Pain A Life to Gain, ang pinakadako nga one-day bloodletting drive sa pungsod.
Ang amo nga aktibidad pagahiwaton simultaneous sa bug-os nga pungsod sa Nobyembre 14, Sabado nga adlaw sa 25 ka mga key-cities sa pungsod sa diin 32 ka mga fully digitalized AM kag FM stations ang naga-operate.
Sa Capiz, patigayunon ini SM City Roxas, Arnaldo, Boulevard, Barangay Baybay, Roxas City.
Magapakigbahin ang Department of Education Capiz sa Dugong Bombo 2026, ang bloodletting activity sang Bombo Radyo Philippines.
Sa interview sang Bombo Radyo kay Dr. Roel Bermejo, Schools Division Superintendent, DepEd Capiz, iya ginpahayag importante ang pagdonate sang dugo bangud dako ini nga bulig sa mga pasyente nga nagakinahanglan sang blood transfusion, ilabi na sa mga na-involve sa aksidente, nagapaidalom sa operasyon kag may iban pa nga medical conditions nga nagakinahanglan sang dugang nga dugo.
Dugang pa sini, paagi sa pagdonate sang dugo, may oportunidad ang isa ka indibidwal nga makabulig sa pagluwas sang kabuhi sang iban, gani nagapanawagan man sila sa publiko nga magpakigbahin sa amo nga inisyatibo kon kwalipikado kag nagakabagay sa mga health requirements.
