Pilason ang apat ka persona sa stabbing incident nga natabo sa sa Barangay Lantangan, Pontevedra, Capiz.
Ang biktima amo sanday alyas Joy, 26-anyos, alyas Franz, 31-anyos, alyas Dodo, 52-anyos, kag alyas Jun, 36 anyos nga lunsay residente sang nasambit nga lugar.
Samtang ang suspek naman amo si alyas Ogil, 45-anyos, residente sang Sitio Tumlos, kag alyas Oyo, 46-anyos residente sang Sitio Poor sang amo nga banwa.
Sa interview sang Bombo Radyo kay Police Captain Maria Fe T Umiten, Officer-in-Charge sang Pontevedra Municipal Police Station, iya ginpahayag nga natabo ang insidente matapos nga nagreklamo ang isa sa mga biktima bangud sa mabaskog nga volume sang sound system sang mga suspek.
Suno kay Umiten, nagkadto ang isa ka biktima sa balay sang mga suspek agud magpangabay nga pahinayon ang volume sang sound system bangud may nagamasakit sa ila panimalay.
Apang, imbes nga masolusyunan ang problema, nagresulta ini sa komprontasyon kag pagpanglabo sa mga biktima.
Base sa inisyal nga impormasyon sang kapulisan, naka-inom sang makahulubog nga ilimnon ang mga suspek sang natabo ang insidente.
