Nagpahamtang sang checkpoint sa palibot sang 6-kilometers nga permanent danger zone agud malikawan ang pagsulod sang mga tawo malapit sa Bulkan Mayon.
Ini ang ginpatigayon matapos nga ibatak ang Alert Level 3 bangud sa pagguwa sang pyroclastic density current ukon “uson” gikan sa bulkan.
Ginpatuman ang pre-emptive evacuation sa pila ka banwa sa Albay, lakip ang Camalig, Ligao City, Malilipot, Daraga, kag Guinobatan, agud mapalayo ang mga residente gikan sa delikado nga lugar.
Suno sa Philippine Institute of Volcanology and Seismology (PHIVOLCS), wala na dapat sang tawo malapit sa 6- kilometer nga permanent danger zone tungod sang kataas nga peligro sini sa kabuhi.
Apisar opisyal na nga ginadumilian ang pagsulod, ginkompirma sang ahensya nga may ara gihapon nga mga pumuluyo nga naga-istar sa lugar rason nga padayon ang pagpahamtang sang checkpoint.
Nagpaandam man ang talatapan sa publiko nga ang exposure sa “uson” mahimo magtuga sang hinali nga kamatayon bangud sa halu-halo nga mainit nga gas, bato, kag abo nga madasig nga nagaguwa paubos sa amo nga bulkan.
Ginahanda naman ang mga evacuation centers para sa ginabulu-banta nga 2,899 ka residente sang Albay nga maga-evacuate.
Samtang, bisan pa man ginadumilian ang pagsulod sa danger zone kadungan sang pagbatak sa Alert Level 3 sang bulkan, ginpahayag sang Department of Tourism nga safe gihapon ang pagbisita kag pagtan-aw sang mga turista halin sa malayo kag luwas nga distansya, bangud ginalauman nga magasaka ang numero sang mga turista kun may aktibidad ang bulkan.
