Ginpakamalaot sang China ang ginpasar nga resolution sang Senado sa Pilipinas kag gintawag ini nga “anti-China” matapos mapasar ang Resolution No. 256 nga nagapakamalaot sa nangin pahayag sang Chinese Embassy in Manila batuk sa mga opisyal nga nagahangkat sa mga tikang nga ginahimo sang Beijing sa West Philippine Sea.
Suno kay Chinese Embassy Spokesperson Ji Linpeng, may yara lamang sang gamay nga ihibalo ang mga senador sang Pilipinas kun paano maghulag ang diplomacy bangud sa pagpakamalaot sa China.
Pahayag ni Ji, pila ka mga legislators sang Pilipinas ang liwat-liwat nga nagapamahog kag naga-intimidate sa Chinese diplomats.
Daw kaangay pahayag sang Chinese embassy spokesperson nga ginabali sang mga senador ang kamatuoran agud mapapati ang publiko.
Gintawag man sini nga political stunt ang Senate resolution.
Ginsabat naman ini si Senate President Vicente Sotto III nga ang kaangay nga pagpakamalaot ang mahimo man nga i-apply sa mga Chinese official.
“He is claiming that we are intimidating Chinese diplomats, yet he continues to speak disrespectfully against us and calls the Senate resolution a mere political stunt,” pahayag ni Sotto.
“I can say the same thing to him—that he knows little about how diplomacy works. Respect begets respect,” dugang pa sang senador.
Nahibaluan nga ang Senate resolution ang nagapakamalaot sa statements sang Chinese Embassy, nga suno sa mga senador, gina-target ang mga opisyal sang Pilipinas nga nagasuporta sa panindugan sang pungsod sa West Philippine Sea.
Nagapanwagan man ini sa Department of Foreign Affairs (DFA) nga maghimo na sang diplomatic measures agud ma-uphold ang dignidad sang Pilipinas kag masiguro nga ang relasyon sa iban nga pungsod ang nagasunod sa international law kag naga-establisar ang diplomatic principles.
