Madinalag-on nga ginlunsyar sang China ang Tianwen-2 spacecraft sang Miyerkules sang kaagahon, bilang kabahin sang una nga misyon sang pungsod nga magkuha sang mga bato gikan sa isa ka malapit nga asteroid.
Naglupad ang Long March 3B rocket halin sa Xichang Satellite Launch Center ala 1:31 sang kaagahon (local time), dala ang robotic probe nga subayon ang kahawaan padulong sa asteroid nga ginatawag nga 469219 Kamoʻoalewa, yara sa kalayuon nga 10 million miles halin sa Earth.
Suno sa state media nga Xinhua, nangin “complete success” ang pag-launch. Ginalauman nga malab-ot sang Tianwen-2 ang asteroid sa Hulyo 2026 kag magapadala sang capsule nga may unod nga sample pabalik sa Earth sa Nobyembre 2027.
Kun mangin madinalag-on, ikatatlo nga pungsod ang China — kasunod sang Japan kag United States nga makakuha sang sample gikan sa isa ka asteroid.
Ang misyon ang kabahin sang madasig nga nagalapad nga space program sang China, kalakip na ang paghugpa sang robots sa likod sang bulan, pagpadalagan sang kaugalingon nga space station, kag plano nga pagpadala sang tawo sa bulan antes mag-2030.
