Nagsugod na ang China sang ila pinakadako nga military exercises sa palibot sang Taiwan kahapon nga adlaw, sa tuyo nga ipakita ang ikasarang sini nga utdon ang kaangtanan sang Taiwan sa iban nga pungsod kag hangkaton ang kahandaan sang military defence sang Taipei.
Suno sa Eastern Theatre Command sang China, ang “Justice Mission 2025” nagalakip sang pagdeploy sang mga tropa, warships, fighter jets, kag artillery agud magpatigayon sang live-fire drills, simulated strikes, kag paghanas sang ila mga tropa sa posible nga pag-blockade sang mga mayor nga pantalan sang Taiwan.
Ang war games ang magasakop sang pito ka zones kag magapadayon subong nga adlaw.
Ginreport sang Taiwan nga nagpatigayon sang iban pa nga zone drills ang Beijing nga wala sang abiso, samtang apektado ang pagbiyahe sang masobra 100,000 ka mga pasahero nga may pila ka mga domestic flights nga ginkanselar.
Ini na ang ika-anom nga pinakadako nga war games sang China sa palibot sang Taiwan halin sang tuig 2022.
Samtang, hugot naman nga ginpakamalaot sang Taiwan ang mga aktibidad sang China sa palibot sini kag ginpanindugan nga ang mga taga-Taipei lamang ang may kinamatarung nga magdesisyon sa palaabuton sang isla.
Nagpaandam man ang Taiwan nga ang live-fire drills nagahatag sang pamahog indi lang sa Taiwan kundi mangin sa iban pa nga rehiyon.
Nahibaluan nga ginpatigayon ang military exercises sang China pila ka adlaw matapos gin-aprubahan sang Estados Unidos ang pinakadaku sini nga arms sales package para sa Taiwan nga una nga ginpamatukan sang Beijing.
