ROXAS CITY, CAPIZ- Opisyal na nga gin-anunsyo sang Department of Education (DepEd) ang pagsugod sang Christmas break para sa mga estudyante para sa 2025-2026 school year.
Sa interview sang Bombo Radyo kay Ms. Yzarda Claudette Ballera, Division Information Officer sang Department of Education Capiz Division, iya ginpahayag nga sandig sa report nga ginpaambit sang DepEd sang Lunes, Disyembre 15, ang bakasyon magasugod sa Disyembre 20, 2025 kag magatakop sa Enero 4, 2026.
Suno kay Ballera, nagasanto ini sa DepEd Order No. 12 nga ginpaguwa ni DepEd Secretary Sonny Angara sang Abril 15, sa idalom sang “Multi-Year Implementing Guidelines on the School Calendar and Activities” nga ginalauman nga sundon sang public elementary, secondary, kag community learning centers (CLCs) sa pungsod.
Sa pihak nga bahin, ginpahayag man sini nga sa pagbalik-eskwela sa Enero, mahimo na nga makaamat-amat sa pagparegister para sa masunod nga school year.
Sa katapusan nga semana sang Enero natalana ang umpisa sang early registration para sa School Year 2026-2027.
Nagpalab-ot naman sang mainit nga pagpanamyaw sang malipayon nga paskwa kag mabinungahon nga bag-ong tuig ang natungdan sa mga manunudlo, mga estudyante kag mga ginikanan.
Reported by Bombo Jessa Mae Siman De Los Santos
