ROXAS CITY – ‘Isa sa spirit sang Christmas amu ang volunteerism, wala sang pinilitay’.
Ini ang ginpahayag ni Dr. Miguel Mac Aposin, DepEd Capiz Division Superintendent sang mainterview sang Bombo Radyo natuhoy sa pagpatigayon sang Christmas party sa mga pampubliko nga buluthoan sa probinsya.
Boluntaryo ang exchange gifts, dekorasyon kag wala sang pwersahan nga kontribusyon pag-abot sa ‘menu’ apang nakadepende ini sa kasugtanan sang manunudlo kag ginikanan.
Indi man mahimo nga indi pagpatambungon ang isa ka estudyante sa Christmas party kun wala ini sang ‘amot’ sa nakasugtanan.
Pahayag pa ni Aposin, nga dapat ipabilin sa tagipusuon ang spirit sang Christmas nga maghatagay, magbinuligay kag wala sang diskriminasyon.
Suno diri, ang Christmas party ang dulu-dulungan nga paga-hiwaton sa Disyembre 15 tubtob lamang sa 4:00 agud hatagan sang kahigayunan ang mga manunudlo nga himuson ang ila hulot-klasehan antes magsugod ang Christmas break.
Mahibaluan, magasugod ang Christmas break sa Disyembre 16, 2023 kag magabalik sa Enero 3, 2024.
