Nagpaandam ang Cybercrime Investigation and Coordinating Center (CICC) batok sa love scam antes sang Valentine’s Day ilabi na gid sa kalalakihan, partikular ang mga tigulang kag mga balo bangud sila ang nagapanguna nga target sang mga love scam.
Suno sa CICC, masami nga target sang love scammer ang mga senior citizens kag mga balo, base sa ila profiling.
Ginapahayag nga kadam-an sa mga biktima sang mga sindikato amo ang mga senior, balo, negosyante kag mga retirado.
Suno kay Usec. Aboy Paraiso, Executive Director sang Cybercrime Investigation and Coordinating Centre, subong nga tuig, may yara sang napulo’g walo ka mga kaso sang love scam nga narekord, lunsay may kahilabtanan sa mga tigulang.
Sa datos nga ginpagwa sang Paraiso sa isa ka forum, nahibaluan nga kalabanan sa mga reklamo nga nabaton sang ila ahensya ang gikan sa mga lalaki nga biktima sang online fraud.
Humalin Enero 9 tubtub Pebrero 6, nakarekord ang CICC sang 18 ka kaso sang nasambit nga modus operandi, kadungan sang pag-abot sang bulan sang tagipusuon.
Suno sa imbestigasyon, ginagamit sang mga scammer ang ginatawag nga seducer kag escort arche-types agud magdaya
Ang mga suspetsado masami nga nagagamit sang makagalanyat apang peke nga mga litrato agud makuha ang atensyon sang biktima.
Sa iban nga mga hitabo, nagapakilala sila bilang mga escort nga nagapasugot nga magkit-anay sa personal apang magapangayo anay sang kuwarta antes madula.
Sa sini nga rason, hugot nga ginapanugyan sang CICC ang pagpatuman sang zero trust policy sa internet.
