ROXAS CITY – Padayon ang pagmonitor sang Criminal Investigation and Detection Group (CIDG)-Capiz sa mga iligal nga tupada ukon pagsugal sa bug-os nga probinsya sang Capiz.
Ini ang ginpahayag ni PMSg. Edney Matillano, Deputy sang CIDG sang mainterview sang Bombo Radyo.
Suno diri, hugot nga ginadumilian ang pagpatigayon sang iligal nga pagsugal kasubong sang STL bookies, card games kag iligal nga pagbulang ilabi na ang E-sabong.
Ang pagpatigayon sang tupada nga wala naka-rehistro sa mga licensed cockpit arena ang magapangatubang sa kaso sa idalum sang illegal cockfighting law kag may penalidad nga P20,000 tubtob P30,000.
Samtang, ginahulat pa sang ila talapatan ang memorandum natuhoy sa ginpapanaug nga mandu ni Presidente Duterte sa pagpa-untat sa e-sabong sa bug-os nga pungsod para sa full implementation sang nasambit nga layi.
