ROXAS CITY – Hugot nga ginpanginwala sang tagdumalahan sang Criminal Investigation and Detection Group (CIDG)-Capiz ang alegasyon sang suspek nga si Arnel Villareña.
Matandaan sang nadakpan sa ginpatigayon nga buybust ops si Villareña sang Oktubre 3, ginbuyagyag sini nga siya ang responsible sa pagpangluthang sa menor de edad kag ang nagsugo sa iya nga luthangon ang negosyante sa Sitio Bangkiling, Brgy. Tiza amu si Jennifer Dela Cruz nga suno sa iya isa ka asset sang CIDG.
Sa interview sang Bombo Radyo kay PLt. Danilo Matahom, OIC sang CIDG-Capiz, suno sa iya wala sila sang asset nga nagapangalan sang “Jennifer Dela Cruz”.
Mahibaluan bangud sa wala nakita ni Villareña ang target sa puluy-an, sa baylo ginluthang sini ang menor de edad nga helper sang negosyante samtang nagahigda ini sa terrace.
Masuwerte nga wala napurohan ang menor de edad nga naigo sang bala sa natuo nga bahin sang kamot.
Paga-imbestigahan naman sang kapulisan kun ano ka matuod ang mga panugdaon sang suspetsado.
Samtang, suno kay Matahom pormal na nga ginpasakaan sang kaso nga paglapas sa R.A 9165 ukon “Comprehensive Dangerous Drugs Act of 2002 kag R.A 10591 ukon “ “Comprehensive Firearms and Ammunition Regulation Act” si Villareña.
