ROXAS CITY – Nakatutok ang Criminal Investigation and Detection Group (CIDG) sa posibilidad sang liwat nga pagpatigayon sang Kabus Padatoon (KAPA) Community Ministry International Inc. sang orientation sa probinsiya sang Capiz.
Ini ang ginpahayag ni Police Major Chris Arthemeus Devaras sang CIDG-Capiz sang mainterview sang Bombo Radyo Roxas.
Sa pihak sang pagkompirma nga nakasulod na ang nasambit nga investment scam sa probinsiya, ginpahayag ni Devaras nga wala pa sang may nagdangop sa mga otoridad nga naka-invest sang kwarta sa amo nga grupo.
Apang ginpasiguro ni Devaras nga nakaalerto sila agud wala sang may mabiktima ang KAPA sa Capiz apang kinahanglan suno sa iya ang bulig man sang Securities and Exchange Commission (SEC).
Mahibaluan nga sang nakaligad nga adlaw sang Dominggo, nagpatigayon sang ila pinakauna nga orientation ang KAPA Pavia-Iloilo Branch nga ginapamunuan ni Mr. Isagane Capitle sa siyudad sang Roxas.
Kasunod sini ang pagkompirma man sang isa ka kilala nga negosyante gikan sa probinsiya sang Capiz sang iya nga paghatag sang donasyon sa grupo bangud sa paglaom nga makakuha ini sang dako nga balik sang kwarta.
