Ginaduso ni Roxas City Councilor Reynaldo Magallanes ang pagpatuman sang City Beach Safety Code agud malikawan ang mga insidente sang pagkalumos sa mga baybayon sang syudad.
Sa interview sang Bombo Radyo kay Magallanes, iya ginpayahag nga sa idalom sang proposed ordinance, ginadumilian ang pagpaligo sa dagat nga yara sa idalom sang impluwensya sang makahubog nga ilimnon kag ginalikawan man ang pagpaligo ilabi na kon malain ang tyempo.
Suno kay Magallanes, ang mga personnel sang CDRRMO, barangay officials kag safety officers ang mangin autorisado sa pagpatuman sang ordinansa sa tion nga mangin epektibo na ini.
Kun mapatud-an ang magalapas sa tion nga mangin epektibo ang amo ordinansa may yara sang nagaigo nga penalidan sa diin ang 1st offense amo ang warning, second offense may multa nga P1,000, samtang third offense may multa nga P2,500 kag posible nga pagkapreso.
Ginpahayag sang natungdan nga isa sa mga rason sang drowning incident amo ang pagpaligo sa dagat samtang yara sa impluwensya sang makahulubog nga ilimnon.
