ROXAS CITY – Wala nahadlok si City Councilor John Paul Arcenas nga maakig ang mga pumuluyo sa iya bangud ginahimo niya malang ang iya obligasyon bilang isa ka councilor, agud malikawan ang asud-asod nga aksidente nga nagakahinabo sa syudad sang Roxas.
Suno diri, kadam-an sa mga naaksidente kag ginbawian sang kabuhi ang bangud sa naangkon nga pilas sa ulo bangud wala sang suksok nga helmet nga kuntani maga-protekta sa ulo sang driver.
Matandaan nga ginpapasar na kahapon sang Sangguniang Panlungsod ang ordinansa nga naga-obliga sa mga motorista nga magsuksok sang standard protective helmet kun nagabiyahe sa syudad.
Ginapangabay man ni City Councilor John Paul Arcenas ang mga motorista nga magsunod sa amu nga ordinansya agud sa safety sang tanan ilabi na ang mganagabiyahe sa layo ukon diri mismo sa syudad.
Ginklaro man sini nga ang ordinansa ang wala sang pinilian, malapit man ukon malayo ang imo padulungan kinahanglan gid magsuksok sang helmet.
