ROXAS CITY – Kwestyunable para kay City Councilor Moreno ‘’Moring’’ Gonzaga ang pagpull-out sa mga pulis nga yara sa outpost sang Barangay Cagay, Roxas City.
Ini ang kaundan sang diskurso-pribilehiyo ni Gonzaga sa ginpatigayon nga sesyon sang Sangguniang Panglungsod .
Ginkatingala ni Gonzaga ang pagpull out sa mga pulis sa outpost sang Barangay Cagay nga nagserbe center post nga nagabantay sa Barangay Balijuagan, Sibaguan, Dinginan kag Talon nga nagresulta sang kalinong kag katawhay sa mga kabaranggayan.
Bangud sa pagpull-out sang mga pulis sa Barangay Cagay namonitor sang mga opisyales sang kabaranggatan ang pagbalik sang mga illegal nga aktibidad sa ila nga mga lugar.
Ginpanindugan ni Gonzaga nga wala na sang may naga-roving ukon nagapatrolya nga mga pulis sa syudad sang Roxas sa diin may namonitor ang mga punong barangay nga kasubong nagabalik ang mga persona sa illegal nga aktibidad.
Nagapati si Gonzaga nga wala kuntani matabo ang pagluthang-patay kay Barangay Kagawad Onel ‘Dodoy’ Arandez sa Barangay Cagay kun may naka-assign lamang nga mga pulis sa lugar.
Ginpahayag sang opisyal nga madugay na sini ginpalab-ot sa hepe sang Roxas City Police Station ang ila concern apang tubtob sa karon wala pa ini sang may nakita nga aksyon.
Samtang na-monitor ni Gonzaga ang pagtenir sang mga pamatan-aon sa plaza bisan dis-oras na sang gab-i.
