ROXAS CITY – Ginkumpirmar ni City Veterinarian Dr. Dante Corros nga nagpatigayon sila sang surprise inspection sa mga ginabaligya nga baboy sa mga talipapa sa Barangay Dayao kag Burgos Street, Roxas City kahapon nga adlaw.
Suno kay Corros may nakumpiskar sila nga kapin 18 ka kilo sang baboy bangud wala ini nag-agi sa slaughter house.
Ang nasambit nga kilo sang baboy nga nakumpiskar ang ginsunog kag ginlubong bilang pagsunod sa bag-o nga pagsulundan.
Nahibaluan nga sandig sa guidelines ang nakumpiskar nga baboy nga wala nag-agi sa slaughter house ang indi mahimu nga ipanagtag.
Aminado si Corros nga may kasaypanan man ang slaughter house bangud sa kapaslawan nga mapasulod sa facilidad ang mga baboy nga ginabaligya sa talipapa.
Nahibaluan nga kinahanglan nga mag-agi sa slaughter house ang baboy agud matatakan ini nga pamatood nakaagi ini sa inspeksyon.
Ginpasiguro ni Corros nga magapadayon ang ila surprise inspection sa mga talipapa agud mahibaluan kun sin-o ang salawayon kag wala nagasunod sa pagsulundan.
