ROXAS CITY – Nagtaas ang produksyon sang lubi sa probinsya sang Capiz, kun sa diin, minilyon ka mga lubi ang natigayon nga ma-harvest sang nagligad nga tuig.
Ini ang ginkumpirmar ni Mr. Noel Alvarez, sang Philippine Coconut Authority (PCA) sang mainterview sang Bombo Radyo.
Suno diri, apisar nga nagpanalasa si Bagyong Odette sang nagligad nga tuig, pasalamat ang ahensya nga wala gid naapektuhan ang mga puno sang niyog sa probinsya.
Ginpahayag man sini nga nagtaas ang demand sang coconut products sang nagligad nga tuig, kag nagalaum man ini nga magapadayon sa gihapon sa subong nga 2022.
Sa pihak nga bahin, nagtaas man ang demand sang Virgin Coconut Oil (VCO) sa probinsya, kun sa diin, ang VCO ang isa ka food supplement nga produkto sang coconut nga base sa clinical trials, makapahagan-hagan sang sintomas sang COVID-19.
Nagapanawagan man ang PCA sa wala pa makaparehistro, nga maghingabot na sa pagparegister agud makasulod apisar nagtakup na ang schedule sa pagrehistro sang mga coconut farmers/owners, ginkalipay sini nga nagabaton sila sa gihapon sa ila talatapan sa luyag nga magparehistro agud makaangkon sang benipisyo nga ginatan-ay sang gobyerno pag-abot sa coconut farming.
Nahibaluan nga sa karon, kapin 60,000 registered coconut farmers ang may yara sa probinsya.
