ROXAS CITY, CAPIZ – Opisyal na nga nagsugod subong nga adlaw, Marso 28 ang kampanya sang mga lokal nga kandidato para sa 2025 Midterm Elections.
Kadungan sini, nagpanugyan si Capiz Provincial Election Supervisor Atty. Milagros Salud Villanueva sa mga local aspiring candidates nga magtuman sa mga pagsulundan sang ahensya sa idalom sang election laws.
Sa interview sang Bombo Radyo kay Atty. Villanueva, hugot nga ginadumilian ang vote buying, vote selling kag pagpanagtag sang kandidato sang cash ukon ano nga kantidad sa tion sang campaign period. Dugang pa sini nga ginabawal man ang presensya sang kandidato sa distribusyon sang assistance sa mga benepisyaryo sang AICS, TUPAD, AKAP KAG 4Ps nga programa sang DSWD.
Hugot man nga ginadumilian ang pagpangampanya sa Abril 17 (Huwebes Santo), Abril 18 (Biyernes Santo), Mayo 11 (sa gab-i antes ang Election Day), kag Mayo 12 ukon sa adlaw mismo sang eleksyon.
Pag-abot naman sa jingle sang mga kandidato, ginahinyo nga respetuhon ang pumuluyo kag indi dapat maglab-ot sa gab-i ang pagpatukar.
Panugyan naman sang COMELEC sa pumuluyo nga kun may reklamo kag may ebidensya, posible ini nga makabig nga election offense kag mahimo nga mapasaka sa piskalya.
Sa pihak nga bahin, nagpatigayon man subong nga adlaw ang COMELEC kaupod ang nagkalain-lain nga ahensya sang nationwide synchronized “Oplan Baklas” para sa mga illegal campaign materials nga nakakabit ilabi na sa indi otorisado nga lugar.
Mahibaluan nga magadugay sang 45 ka adlaw ang campaign period ukon tubtob sa Mayo 10 sini nga tuig.
