ROXAS CITY – Preparado na ang Commission on Elections (Comelec-Capiz) para sa nagahilapit nga May 2019 midterm elections.
Ini ang ginpahayag ni Provincial Election Supervisor Atty. Jessie Suarez sang mainterview sang Bombo Radyo.
Suno kay Suarez, nga hugot nila nga ginasunod ang timeline sang komisyon kun sa diin nagsugod na sila sa pagpang-distribute sang mga election paraphernalia sa mga kabanwahanan sa probinsiya.
Natalana naman nga magaabot sa masunod nga mga inadlaw ang mga Vote Counting Machines (VCMs) kag ila ini nga ipahamtang sa safe nga warehouse samtang wala pa ang nasambit nga piniliay.
Wala naman suno kay Suarez nadugangan ang ila mga areas of concern subong nga eleksiyon.
Kalakip sa election watchlist areas amo ang banwa sang Pilar, Tapaz, Maayon, President Roxas kag Cuartero bangud sang intense political rivalry.
Gintawag man ni Suarez ang atensiyon sang mga kandidato kag partido nga nagapanagtag sang kwarta ukon nagapatigayon sang mga pahampang nga may mga papremyo sa ila nga pagpangampanya ukon pagpatigayon sang caucus.
Makonsiderar ini suno kay Suarez nga paglapas sa pagsulundan sang komisyon bangud makabig ini nga vote-buying.
