PRESIDENT ROXAS, CAPIZ- Hugot nga ginpahayag ni President Roxas, Capiz Mayor Receliste Escolin nga indi pa pinal kag epektibo ang desisyon sang Commission on Elections (Comelec) First Division nga kanselahon ang iya nga Certificate of Candidacy (COC) para sa tinalikdan nga eleksyon.
Base sa 22 ka-panid sang desisyon sang Comelec First Division, ginpaboran ang gin-file nga petisyon nanday Richard Baltar kag Arnulfo Degala para kanselahon ang COC ni Escolin, nga nagapahayag nga naglapas ini sa three-term limit rule matapos makumpleto suno diri ang tatlo ka magkasunod nga termino bilang alkalde.
Nakasandig sa desisyon nga ang tatlo ka bulan nga suspensyon ni Escolin nagikan sa Office of the Ombudsman ang indi bastante nga rason para mahambal nga “naantala” ang iya nga termino.
Madumduman nga ginsuspinde si Escolin sang Pebrero 2025 bangud sa kaso sang simple misconduct, apang liwat siya nga nagpapili sang tinalikdan nga eleksyon kag naproklamar bilang nagdaog nga alkalde sang Mayo 13, 2025.
Sa interview sang Bombo Radyo Roxas, ginpahayag ni Escolin nga magasumiter sila sang motion for reconsideration sa Comelec En Banc para ipakigbato ang iya nga bahin kag pamatud-an nga kwalipikado man siya sa gihapon nga mangin alkalde.
Suno pa sa iya, indi dapat pagbilangon sang padayon ang iya nga termino bangud nga temporaryo ini sya nga ginpapanaog sa pwesto bangud sa suspension.
Samtang, ginsiguro ni Escolin nga magapadayon sa gihapon ang serbisyo sang iya nga administrasyon para sa mga residente sang President Roxas samtang naka-pending ang pinal nga desisyon sa iya nga kaso.
Interviewed by Bombo Francis Biñas
