ROXAS CITY – Yara na sa 99.9% nga preparado ang Commission on Election ukon Comelec para sa patigayunon nga eleksyon sa Lunes, Mayo 13 sa probinsya sang Capiz.
Ini ang ginpahayag ni Provincial Election Supervisor Atty. Jessie Suarez sang mainterview sang Bombo Radyo Roxas.
Suno kay Suarez nga 745 tanan ka mga buluthuan sa probinsiya ang gamiton bilang polling precints sa adlaw sang eleksyon.
Nakahanda man ang kapin 2,200 ka mga Board of Election Inspectors (BEI) nga mag-assister sa mga botante.
Dugang pa sini nga kumpleto naman ang tanan nga mga kinahanglanon sang Comelec sa maabot nga eleksyon.
Ginpahayag pa sini nga nangin matalunsay sa pangkabilugan ang ginpatigayon nga Final Testing and Sealing sang mga Vote Counting Machines sa probinsiya.
Samtang, nagpanugyan naman si Suares sa publiko nga pilion sang maayo ang kandidato nga botohon sa eleksyon agud masiguro ang maayo nga buwas damlag sang pungsod.
