DAO CAPIZ – Ginransak sang wala makilan-an nga kawatan ang computer laboratory sang Luis Escutin National High School, Barangay Duyoc, Dao Capiz.
Sa interview sang Bombo Radyo sa hepe sang Dao Municipal Police Station nga si PCapt. Dandy Delfin, nagpadulong sa ila talatapan sanday Maricel De Mateo, Jesse Escutin lunsay mga teacher III, kag School Principal nga si Merry Joy Estialbo agud iparecord nga suno sa caretaker sang amu nga buluthuan ginapahayag nga ginsulod sang wala makilan-an nga indibidwal ang computer laboratory.
Suno kay Delfin, natigayon nga mataban sang kawatan ang 17 units nga HP laptop, 2pcs nga tablet PC, kag 6 ka mga bag nga mahibaluan naglab-ot sa masobra P676, 812.42 ang balor sang nasambit nga kagamitan.
Dugang pa sini nga nagalalapta na ang iban nga kagamitan sa amu nga hulot suno sa mga manunudlo
Ginapahayag nga pinaagi sa pagwasak sa padlock sang pirtahan natigayon nga makasulod ang kawatan.
Sa karun, padayon pa ang imbestigasyon sang Dao MPS, sa nasambit nga insidente.
