ROXAS CITY – Prayoridad ni Congressman Tawi Billiones nga pagahatagan sang nagakaigo nga pondo ang mga proyekto sa mga kabarangayan ilabi na ang farm to market road.
Sa interview sang Bombo Radyo kay Congressman Billiones sang primero distrito, ginsiling sini nga nakig-angut na ini sa mga kapitanes kag mga alkalde natuhoy sa mga prayoridad nga proyekto nga luyag sang mga opisyal nga hatagan sang pondo.
Mahibaluan nga sumugod sang nagpungko ini bilang congressman kapin 85% tubtob 87% na sa mga kabarangayan ang ginhatagan sang budget para sa ila proyekto.
Aminado man si Billiones nga wala sang bastante nga pondo rason nga pagaunahon sang iya talapatan ang mga kabarangayan nga wala nahatagan sang nanliligad nga tuig.
Ginpakigbahin man sini, nga nakighinun-anon na ini kay Governor Fredenil Oto Castro may kaangtanan sa mga proyekto nga nagakinahanglan sang pondo subong nga 2022.
Suno diri, nahinalaan ang close coordination agud wala sang mausik nga pondo sa pagpakay-o sang mga dalanon.
Nagapasalamat man si Billiones sa gobernador nga isa sa prayoridad sini ang pagpakay-o sang imprakstraktura sa mga lugar sa first district.
Samtang, ginpahayag man sini nga may ginpain na nga budget para sa pagpakay-o sang nagguba nga tulay sa Brgy Tuburan banwa sang Maayon sang kasagsagan sang bagyong Agaton kag tinguhaan sini nga mapadasig ang pagpakay o sang nasambit nga tulay agud maresolbar na ang ginaproblema sang pumuloyo.
