Ginalantaw sang isa ka Constitutional Law expert kag Presidente sang Philippine Arbitration sa Visayas nga posible may legal nga basehan ang ginpahayag ni Davao City Mayor Sebastian “Baste” Duterte sa pagpirma sang mga opisyal sa kontrata sa idalpm sang Davao City government.
Sa interview sang Bombo Radyo kay Atty. Joenar Pueblo, iya ginpahayag nga posible ini nga sakop sang Arias Doctrine, nga nagahatag sang pagkilala nga ang isa ka public official nga mahimo magsalig sa trabaho kag pirma sang iya mga subordinate ukon awtorisado nga representante.
Suno kay Pueblo, nag-angot ini sa pahayag ni Mayor Baste nga wala niya nahibaluan ang tanan nga kontrata nga ginpirma sang mga opisyal sang Davao City government kag wala man siya nahibaluan nga may interes si Vice President Sara Duterte sa GenCorp sang ginpatigayon ang mga transaksyon.
Nahibaluan nga gin-deklara ni Vice President Sara Duterte ang GenCorp bilang isa sa iya business interests sa iya 2024 kag 2025 Statement of Assets, Liabilities and Net Worth ukon SALN.
