Natalana sa tuig 2026 ang construction sang Panay River Basic Integrated Development Project sa Capiz agud makabulig sa pagpahagan-hagan sa pagbaha sa probinsya.
Suno kay Department of Economy, Planning, and Development Region 6 Director Arecio A. Casing Jr., target sang ahensya nga matapos ang detailed engineering design sa masunod nga tuig.
Pahayag niya, ang proyekto ang yara na sa detailed design stage nga kabahin sang padayon nga feasibility study nga ginapatuman sang National Irrigation Administration (NIA).
As of October 2024, gin-report ni NIA-6 Director Engr. Jonel Borres nga yara na sa 91.18% complete ang design.
Nagaplano ang NIA nga maggamit sang design-and-build scheme, buot silingon isa ka contractor lamang ang magakapot sang design kag construction phases.
Ang ini nga setup ang ginalauman nga makapadasig sang proseso kag masiguro ang mahipid nga trabaho.
Pagalakipan ang infrastructure project sang multi-purpose high dam, afterbay dam, irrigation canals, hydropower facilities, kag systems para sa flood control kag water supply.
Sa tion nga mag-umpisa sa 2026 ang construction, lauman nga makumpleto ini sa sulod sang anum tubtob walo ka tuig sa diin ginalantaw ang target finish date sa mid-2030s.
Una na nga gin-anunsyo ni Capiz Governor Fredenil Castro nga gin-aprubahan ni President Ferdinand Marcos Jr. ang proyekto sang Pebrero 2025.
Nagpasalig ang Presidente sang initial nga ₱4.5 billion, ukon ginabanta 15% sang total project cost agud maumpisahan ang pagkaayo.
Sa tion nga makumpleto, ang Panay River Basin Project ang maka-proteher sang ginabanta 26,800 hectares sang farmland nagikan sa pagbaha, maka-produce sang 18.42 megawatts sang clean energy, kag makahatag sang reliable water supply para sa ginabanta 25,000 nga mga mangunguma sa probinsya.
