PRESIDENT ROXAS, CAPIZ – Gindeklara nga dead-on-arrival ang isa ka construction worker matapos makuryente bangud nasag-id ang ginahakwat sini nga kabilya sa main line sang Capiz Electric Cooperative (CAPELCO) sa Barangay Aranguel, President Roxas, Capiz.
Ang napatay amo si John Paul Sapan, 41 anyos kag residente sang Barangay Nagsipit, San Joaquin, Iloilo.
Sa interview sang Bombo Radyo kay Police Major Alfred De Leon, hepe sang President Roxas Municipal Police Station, iya ginpahayag nga magluwas sa napatay, may duha pa ka mga kaupod sini nga nakuryente man kag nakaangkon sang paso sa kamot.
Ini amo sanday Jumper Lama, 31 anyos, residente sang Barangay Agimitan, Passi City kag Elias Bacli, 24 anyos sang Barangay Aranguel, President Roxas, Capiz.
Suno kay Major De Leon, nagadaho-anay sang kabilya ang tatlo ka mga construction workers pasaka sa ika-duha nga panalgan sang school building samtang yara sila sa scaffolding.
Sa subong, padayon nga ginabulong sa ospital ang duha ka mga construction workers.
