Isa ka construction worker ang ginbuno sang iya kaupdanan sa ilimnan sa Sitio Takas, Barangay Liong, Roxas City, Capiz,.
Ang biktima amo si alyas Julius, 30 anyos, kag ang suspek amo si alyas Logie, isa man ka construction worker kag residente sang amo man nga lugar.
Suno sa inisyal nga imbestigasyon sang Roxas City Police Station, naga-inum ang biktima upod ang iya manghod kag abyan sa ila balay sang maglabay ang suspek nga ginapatihan nga yara man sa impluwensya sang makahulubog nga ilimnon.
Sa wala ginahingadlan nga rason, ginpalapitan sang biktima ang suspek, apang hinali na lang ini ginbuno sang suspek gamit ang kutsilyo nga nag-igo sa idalom nga tuo nga bahin sang tiyan sang biktima.
Gilayon man nga gindala sa ospital ang biktima agud dapatan sang pagbulong.
Matapos ang insidente, gilayon man nga nagpalagyo ang suspek.
Sa subong, nagapadayon ang ginahimo nga hot pursuit operation sang kapulisan agud madakpan ang nasambit nga suspek.
