ROXAS CITY – Dead on arrival na sang ginpandangat sa Roxas Memorial Provincial Hospital, ang isa ka construction worker matapos ginapahayag nga ginsumbag sa Teodoro Arcenas Trade Center, Brgy VIII, Roxas City.
Ginkilala ang biktima kay Rodante Villaranda, 39-anyos, kag residente sang Barangay Inzo Arnaldo, Roxas City.
Samtang ang ginapahayag suspek ang ginkilala kay Certain Ronaldo Balbona Alias “Tulisok”, yara sa legal nga pang-edaron, kag temporaryo nga nagapuyo sa Barangay Milibili, sining syudad.
Sa impormasyon nga nakuha sang Bombo Radyo nagikan sa Roxas City PNP, ginapahayag nga suno sa collector sang TATC nakit-an sini ang biktima nga nagahigda na lamang sa kilid sang gate kag wala na sang alentro.
Bangud sini, gilayon siya nga nagpangayo sang bulig sa naka-duty nga security guard kag didto nagtawag sang Roxas City Emergency Response Team (RCERT) agud respondihan.
Mahibaluan nga suno sa suspek, hinali lamang nga naghugot sang kutsilyo ang biktima apang bilang depensa ginsumbag sini ang biktima kag naigo sa baba kabangdanan sang iya pagkatumba kag nalipong.
Ginapahayag nga yara sa impluwensya sang makahulubog nga ilimnon ang nasambit nga bikima.
