ROXAS CITY -Ginpanindugan sang pamunuan sang City Engineers Office nga kinahanglan nga magkuha sang construction permit ang mga contractor antes magsugod sang konstruksiyon sa isa ka proyekto sa siyudad.
Ini ang ginpahayag ni City Engineer Noel Laminares sang mainterview sang Bombo Radyo.
Ginpahayag ni Laminares nga sandig sa City Ordinance No. 046-2016 nga kinahanglan nga magkuha sang construction permit ang mga contractor antes magsugod sang konstruksiyon sang isa ka proyekto.
Suno diri nga para naman sa G-Arabia Platinum Construction Development Company, kinahanglan nga magsumiter ini sang certification of completion sa city government nga nagapamatuod nga natapos na ang ila ginakaayo nga dalan sa Barangay Dayao kag Barangay Culasi, Roxas City.
Ini agud mapadayon na ang nauntat nga pagpakaayo sang dalan sa San Roque Street, sining siyudad.
Luyag ni Laminares nga magpadulong sa opisina sang City Engineers Office ang tiglawas sang nasambit nga construction company agud ma-comply ang mga kulang mga rekesitos agud makakuha sang construction permit.
