ROXAS CITY – Naga-operate 24/7 ukon 24 oras ang mga katapo sang City Ordinances and Regulations Enforcement (CORE) unit sa pagpanguna sang mga deployed member sang Roxas Component City Police Station (RCCPS) agud hugot nga ipatuman ang mga bag-o nga ordinansa sa syudad sang Roxas.
Ini ang ginpahayag ni Mr. Ronald Amigo, pinuno sang City Environment and Natural Resources Office (CENRO) sang mainterview sang Bombo Radyo.
Pahayag ni Amigo, nga wala untat ang paglibot sang CORE unit agud masiguro nga nagasunod sa ordinansa ang pumuluyo kag mabutang sa ila paino-ino nga mangin responsable sa palibot.
Suno diri, ang CORE unit ang ginakalakipan sang miyembro sang PNP agud magluwas nga masiguro nga nagasunod ang pumuluyo, masiguro man sini ang seguridad sang mga kaupdanan ilabi na sa peligro nga posible matabo bangud sa pagpamahog.
Samtang, ginkalipay man ni Amigo ang amat-amat nga pagnubo sang numero nga na-aaprehend sang CORE unit nga nagabayolar sa Smoke-free and Vape-free Ordinance of Roxas City, Baybayon ko, Limpyohan ko, Comprehensive Anti-Littering and Anti-Dumping Ordinance, kag 2002 Traffic Code of Roxas City.
Matandaan sa datos nga ginpaguwa sang CENRO, naglab-ot sa masobra 200 na ang na-aprehend sa sulod sang 1 ka semana nga pag-operate sang CORE unit kun sa diin pinakamadamo diri ang naglapas sa Smoke-free and Vape-free Ordinance of Roxas City.
