ROXAS CITY – Ginpalawig sang Philippine Health Insurance Corporation (Philhealth) ang coverage para sa mga pasyente nga nagapa-idalum sa hemodialysis.
Gikan sa 90 ka sesyon kada tuig nagalab-ot na ini karon 156 ka sesyon, sandig sa Philhealth Circular 2023-009.
Sa pagpakig-angut sang Bombo Radyo kay Mrs. Mary Jane Amigo information officer sang Philhealth Capiz, ang mga pasyente nga kwalipikado sini ginalakipan sang mga indibidwal nga may Chronic Kidney Disease stage 5, sa diin, kinahanglan nila magpaidalum sa dialysis sang tatlo ka beses kada semana ukon 52 ka semana sa sulod sang isa ka tuig.
Nahibaluan nga P2,600 kada sesyon ang ginacover sang Philhealth, pinaagi sa dugang nga pundo sang Philippine Amusement and Gaming Corporation (PagCor) kag Philippine Charity Sweeptakes Office (PCSO)sa diin ginpatuman ini sang Hunyo 22 2023.
Gindugang pa ni Amigo nga 156 ka sesyon sa dialysis ang separado sa 45 ka adlaw nga coverage sang PhilHealth sa pasyente sa Annual benefit limit.
Samtang kinahanglan sang mga kwalipikado nga pasyente nga mag-enroll ukon magparehistro sa Philhealth Dialysis Database para mamonitor kun pila na lamang ang nagamit kag nabilin sa sesyon kag mahimo nga magpakig-angot sa dialysis center ukun sa mga ospital kun sa diin nagapa-idalum sa dialysis ang isa ka pasyente.
