Wala pa sang nakuha nga impormasyon ang contact tracing team nga nagpangusisa sa COVID-19 positive nga nadakpan kahapon matapos nagpalagyo sa Hortus Botanicus kun sa diin kag sin-o ang iya nakahalubilo nga mga indibidwal sa apat ka adlaw nga pagpanago sini.
Ginpahayag ni City Disaster Risk Reduction and Management Office head Dennis Saneo nga matapos madakpan si Santos Manican 18-anyos kag residente sang Barangay 5, sining syudad ginpahamtang ini sa isa ka hulot, ginpapahuway kag gindul-ungan sang pagkaon.
Ginakumbinsi ini sang contact tracing team nga isugid kun diin ini nakalab-ot sang nagpalagyo sa Hortus Botanicus kag sin-o ang iya nakaupod, bangud importante nga mahibaluan ang lokasyon sang amo nga mga persona bangud makabig na sila nga high risk contact matapos nakaangkon sang close contact kay Santos nga COVID-19 positive.
Nag-apelar man si Saneo sa sin-o nakahalubilo ni Santos nga indi magkahuya kag magpakig-angut kag magtawag sa hotline number sang CDRRMO nga 09190082274 agud mahatagan sang assistance sang gobyerno.
Gin-athag sang opisyal nga katuyuan sini nga mabuligan ang nakaangkon sang close contact kay Santos kag mapaidalum sila sa monitoring kag quarantine kun kinahanglanon.
Nahibaluan pa nga ang duha ka mga personel sang CDRRMO nga nag-asister sa pagkadakup kay Santos ang ginpaidalum na sa quarantine.
Sa liwat ginhinyo ni Saneo ang kooperasyon sang mga nakaupod ni Santos sa sulod sang apat ka adlaw nga pagpanago sini nga magpakig-angut na sa CDRRMO agud makadtuan, mausisa kag mapaidalum sa monitoring kun nagalain ang ila pamatyag.
