ROXAS CITY – All set na ang operasyon sang City Diagnostic and Laboratory Center sa siyudad sang Roxas agud magpatigayon sang Real Time-Polymerase Chain Reaction or RT-PCR Test sa Hortus Botanicus, Barangay Milibili, Roxas City.
Sa interview sang Bombo Radyo Roxas kay City Mayor Ronnie Dadivas ginpahayag sini nga nakapasar na sa Proficiency Test for Sars-COV-2 Detection kag nakakuha sang 100% Proficiency Score Test Score sang Department of Health Research Institute for Tropical Medical Molecular Laboratory.
Ginpahayag sini nga kwalipikado na ang siyudad nga magpatigayon sang kaugalingon nga RT-PCR Test sa probinsya matapos nabaton na ang License to Operate gikan sa DOH.
Dugang pa sini nga kumpleto naman ang mga medical personnel nga magaasikaso sa amo nga pasilidad.
Suno kay Dadivas nga pagabuksan ini adlaw-adlaw umpisa alas 7 sang aga tubtob alas 7 sang gab-i agud ipaidalom sa test ang mga ginpadala nga specimen.
Magluwas diri gin-athag sang alkalde nga duha ka klase diri ang magapaidalom sa test kun sa diin ginalakipan sang out-patient kag in-patient.
Mahibaluan nga libre ang pagpaidalom sa swab test kun residente sang siyudad ukon eligible kag kwalipikado ini ukon ginrefer naman sang City Health Office.
Apang, kun personal lamang ini nga interest may yara sang pagabayaran ang luyag magpa-tets.
Bangud diri, ginkalipay naman sang alkalde ang maayo nga balita kun sa diin tikang na ini sang gobyerno agud mabuligan kag mapaidalom sa COVID-19 test ang tanan nga mga residente indi lamang sa siyudad subongman sa iban nga mga kabanwahanan.
Samtang, natalana naman ang inagurasyon sa nasambit nga pasilidad buwas, Oktubre 20, 2020 kaupod ang Department of Health Region 6.
