ROXAS CITY — Wala sang kamatuoran ang nagalagaw nga mga reports sa social media kag sa mga text messages nga may grupo sang mga lalaki nga nagasabwag sang kalakasan sa banwa sang Dumarao, Capiz.
Suno sa hepe sang Dumarao PNP nga si PSI Amy Bulaqueña, ginrespondehan nila ang pito tanan nga kasubong sini nga mga report nga nagalapta sa banwa kag base sa ila assessment, wala ang mga ini sang kamatuoran.
Mahibaluan nga base sa mga report nga nagalapta sa social media kag mangin sa mga text messages, may grupo sang wala makilala nga mga suspetsado nga nagapinanuktok kag tuyo nga magsulod kag mangawat ukon maghimo sang iban pa nga sahi sang krimen sa pila ka mga kabalayan sa amo nga banwa.
Apang nagapati si Bulaqueña nga nagikan ini nga mga sala nga impormasyon sa mga nagalapta man sadto nga mensahe nga may mga priso nga nakapalagyo gikan sa Masbate kag nagasabwag sang kalakasan sa Northern Iloilo.
Suno pa sa hepe nga mahimo ginasakyan lamang sang pila ka mga grupo ang ini nga nagalapta nga mga report agud makatuga sila sang kakugmat, apang wala man sila sang katuyuan nga maghimo sang mga krimen.
Nagapati man ang pulisya nga mahimo indi man sang iban sa lugar ang ini nga mga grupo bangud kasubong nga sunado nila ang lugar nga ila ginapadulongan.
