Narekober sang 82nd Infantry (Bantay Laya) Battalion ang isa ka cache sang armas nga ginpanag-iyahan sang mga nabilin nga miyembro sang Communist Terrorist Group (CTG), Komiteng Rehiyon-Panay (KR-P), sa mga liblib nga bahin sang Libacao, Aklan, Iloilo, kag Capiz sang Marso 14, 2026.
Suno sa militar, nabuligan sang importante nga impormasyon nagikan sa mga lokal kag kooperasyon sang Friends Rescued (FRs) ang madinalag-on nga operasyon.
Narekober halin sa lugar ang isa ka M1 Garand rifle, mga magazine nga may kapasidad nga 20 kag 30 bala para sa 5.56mm, 141 rounds sang 7.62mm, 12 rounds sang .30 caliber carbine, apat ka rounds sang caliber .30 M2, kag duha ka rounds sang 40mm high explosive.
Gindayaw ni Major General Michael G. Samson, Commander sang 3rd Infantry Division, ang koordinasyon sang mga soldado kag sang komunidad, kag hugot nga ginsiling nga padayon nga nagahuyang ang ikasarang sang CTG sa Panay.
