Ginlunsyar sang Department of Agriculture (DA) ang Adaptation and Mitigation Initiative in Agriculture (AMIA) program sa Brgy. Jolongajog, Pontevedra, Capiz agud suportahan ang nagkalainlain nga mga proyekto sa agrikultura.
Tinutuyo sang programa amo ang mapasangkad ang pangabuhian sa sektor sang agrikultura kag pagpalig-on sang kapasidad sang mga mangunguma sa pag-atubang sang mga epekto sang climate change kag mga krisis sa ekonomiya.
Sa interview sang Bombo Radyo kay Director Agnes Catherine T. Miranda sang Climate Resilient Agriculture Office (CRAO), iya ginpahayag nga importante nga mapasanyog pa ang AMIA program agud magapadayon ang mga bulig nga ginahatag para sa mga mangunguma.
Suno pa kay Miranda, paagi sa padayon nga implementasyon sang programa, mas madamo pa nga mga komunidad sang mga mangunguma ang makabenepisyo kag mangin mas handa sa mga posible nga kalamidad kag iban pa nga mga sitwasyon nga mahimo makaapekto sa ila mga pananum.
Lakip sa mga proyekto nga ginpresentar sa programa amo ang vermicompost production, bokashi fertilizer production, organically grown vegetables, native chicken production, pig production, mushroom production, processed livestock products, kag pigmented rice production.
