Maga-alokar ang Department of Agriculture sang kapin P150 milyones nga balor sang fuel subsidy para sa mga mangingisda kag mangunguma bangud sa padayon nga pagsaka sang presyo sang krudo kag petrolyo.
Suno kay Assistant Secretary for Special Concerns and Official Development Assistance and Agriculture Spokesperson Engr. Arnel De Mesa, gikan sa sini nga kabug-usan nga budget, P75 milyones pesos ang ginpain para sa mga mangingisda samtang ang nabilin para sa mga mangunguma.
Ginsiling niya nga may yara sang pinasahi nga probisyon para sa pagpanagtag sang subsidiya sa gatong sa general appropriations act nga ang presyo sang mga produktong petrolyo dapat una nga maglab-ot sa $80/kada bariles antes ang pundo mapanagtag sa mga benepisyaryo sini.
Nagpanawagan man ang departamento sa mga retailers kag stakeholders sa sektor sang agrikultura nga indi pag-abusuhon ang pagtaas sang presyo sang krudo agud magtaas man ang presyo sang ila mga produkto sa agrikultura.
Ginsiling sini nga ang iya ahensya, kaupod ang Department of Trade and Industry (DTI), padayon nga nagatutok sa pagbantay sang presyo sang mga balaklon sa mga merkado agud masiguro nga wala sang gulpi nga pagtaas sang ila presyo bangud sang oil price hike sa gasolina.
Sa subong, ginalauman nga magapabilin nga stable ang hulag sang presyo sa mga merkado kag wala pa sang makita nga pagtaas, rason nga ginpanugyan man ni De Mesa sa mga konsumidor nga memoryahon ang mga hampang sa presyo kag ang husto nga range sang mga produkto agud malikawan nga maabusuhan sang pila ka mga retailers.
