Gina-finalize na sang Department of Agriculture (DA) ang isa ka draft bill nga nagatinguha nga mapabaskog ang kapasidad sang National Food Authority (NFA) sa pag-establisar sang presyo kag supply sang bugas.
Suno sa DA, tinutuyo sang hagna nga mabag-o ang mga polisiya sang gobyerno kag mapabaskog ang food security. Magahatag man ini sang otoridad sa NFA nga makahimo sang gilayon nga desisyon agud mapabilin ang supply sang bugas.
Isa ini sa mga solusyon nga ginhingyo ni House Speaker Ferdinand Martin Romualdez agud suportahan ang P20 rice program ni Presidente Ferdinand Marcos Jr. sa idalum sang Benteng Bigas Meron na (BBM).
Ang draft bill magasunod man sa Rice Tarrification Law agud tugutan ang NFA nga makabaligya kag makadumala sang ila buffer stock.
Pinaagi sa nasambit nga regulasyon, mahatagan sang kinamatarong ang NFA nga magdumala sang buffer stocks para sa madasig nga pagpanagtag sang bugas, nga magapadasig kag mangin efficient sa pagsabat sa kinahanglanon sang publiko.
