Nagpaandam ang Department of Agriculture (DA) nga mahimo maapektuhan ang sektor sang agrikultura sang Pilipinas bangud sa nagalala nga tensiyon sa Middle East, kasunod sang airstrike sang Estados Unidos batuk sa Iran.
Suno kay Agriculture Secretary Francisco Tiu Laurel Jr., ang pagtaas sang presyo sang gatong tuga sang gamo ang mahimo nga makaapekto sa presyo sang petroleum-based fertilizers, gastos sa freight, kag operasyon sang mga makinarya sang mga mangunguma kag baroto sang mga manugpangisda. Ginsambit man niya nga ano man nga pagka-delay sa ruta nga Strait of Hormuz, importante nga alagyan sang suplay sang langis, ang mahimo nga magtuga sang mas mataas nga presyo sang krudo sa pangkalibutanon nga merkado.
Pahayag ni Tiu Laurel, ang ahensiya nagabantay sang hugot kag ginatun-an ang mga tikang agud mapabilin ang food security kag mapahagan-hagan ang epekto sa mga prodyuser kag konsyumer.
