Nagpagwa sang order ang Department of Agriculture (DA) agud ipaidalom sa special safeguard duties ang pila ka meat products kag chicken curry nga gin-import sa Pilipinas.
Ang Special Safeguard Duties (SSG) amo ang temporary extra taxes nga ginabutang sa mga imported agricultural goods.
Sa Department Order No. 24 nga ginpagwa sang Agosto 5, ginpangabay sang Agriculture Secretary ang Bureau of Customs, pinaagi sa Department of Finance, nga ipatuman ang volume-based special safeguard measure (SSG) sa mga masunod nga produkto:
- Boneless beef nga fresh ukon chilled
- Chicken curry nga yara sa airtight containers kag ginabaligya sa retail
- Iban pa nga prepared kag preserved meat sang baboy, lakip ang ham kag mga ginpanghiwa nga parte sini, nga wala sa airtight containers para sa retail
- Iban pa nga prepared kag preserved meat, meat offal kag dugo sang baboy, lakip ang luncheon meat, nga wala sa airtight containers para sa retail
- Iban pa nga prepared kag preserved meat, meat offal kag dugo sang baboy, lakip ang ham, mga ginpanghiwa nga parte sini kag luncheon meat nga yara sa airtight containers para sa retail
Suno sa DA, base sa ila monitoring, ang aktwal nga volume sang imported nga mga produkto naglapaw sa gin-set nga trigger volume ukon limit.
Bangud sini, kinahanglan nga ipatuman ang special safeguard duties sa mga nasambit nga produkto.
